عبدول‌امل ناغیلی
بیر گون واریدی بیر گون یوخیدی آلّاهدان سوْوای هئچ کس یوخیدی. بیردانا پادیشاه واریدی. اوْنون اوچ قیزی واریدی، قیزلار قالیپ ائوده یئکلمیشدی. بیرگون قیزلار دئیللر کی پادیشاه، قبله عالم ساغ اوْلسون، بیزی وئر اره. پادیشاه دئدی، باش اوسته، وزیری چاغیردی دئدی صاباح خیاوان سولانسین، سوپو رولسون، منیم قیزلاریم گئتسین آلما آتسین. صاباحینا وزیرینن وکیل خیاوانی سولادی سوپوردی قیزلار گئتدی آلما آتدی. بؤیوک قیز آتدی گئتدی دوشدی وزیرین دامینین اوستونه، اوْندان کیچیک قیزآتدی گئتدی دوشدی وکیلین دامینین اوستونه، لاب کیچیک قیزدا آتدی گئتدی دیدی قره داشا قاییتدی، بیرده آتدی یئنه گئتدی دیدی قره داشا قاییتدی، اوچینجی ده گئتدی دوشدی چؤل بیابانا. دئدی باجی سیزین یئریز بیلیندی، سن وزیرین ائوینه گئده جاقسان، سن ده وکیلین، من ده گئدیم گؤروم باشیما نه گلیر. قیز گئتدی، آز گئتدی چوخ گئتدی بیر قدیر یول گئتدی بیردن گؤردی بیر دانا قورد گلیر، اوْتدی آغلادی دئدی وای وای قورد ییین جانیم وای. دئمه اوْدا قورد دئیر،عبدول‌امل دیر، گیریب قورد جیلیتینه. قورد گلدی دئدی قیز نییه آغلیرسان قیز جواب وئرمه دی، دئدی من نن قورخورسان، قیز دئدی هن، دئدی من قورد دئیره م، سئحر اوخودی قورد جیلیتیندن چیخدی، دئدی مننن قورخما من سئحر اوخورام قورد جیلیتینده دولانیرام قورد سوروشدی سن بوْردا نه ائدیرسن قیز دئدی بئله آلما آتمیشیق منیم باشیمین موصوبتی بوْدی. عبدول‌امل دئدی من سنی آپاریرام ائویمیزه آمما بیر دانا شرطیم وار. قیز دئدی نه مه نه، عبدول‌امل دئدی منیم ننه م دئودیر گه ره سؤزوندن چیخمیاسان، سؤزوندن چیخسان سنی یییر. قیز دئدی من گلمیرم عبدول‌امل دئدی من ننه می آند ایچدیررم ننه م منیم جانیما آند ایچسه سنی یئمه‌ز. عبدول‌امل بوْ قیزا سئحر اوخودی قیز اوْلدی بیر دانا آلما، آلمانی قویدی جیبینه گئتدی گیردی ائوه. دئو دئدی، عبدول‌امل، آدام مادام ایسی گلیر شاققلی بادام ایسی گلیر عبدول‌امل دئدی ننه داغدا داشدا یئمیسن دیشیوین دیبیندن ایسی گلیر، یئنه دئو دئدی، عبدول‌امل، آدام مادام ایسی گلیر شاققلی بادام ایسی گلیر دئدی ننه داغدا داشدا یئمیسن دیشیوین دیبیندن ایسی گلیر اوچ دؤرد یول ائله بوجور دئدیلر آخیرده عبدول‌امل دئدی، ننه آند ایچ کی ایشین اوْلماز دئو دئدی عبدول‌امل جانی ایشیم اوْلماز. عبدول‌امل سئحر اوخودی آلما اوْلدی قیزی قویدی یئره دئو باخیر قیزا آمما دینه بیلمیر عبدول‌امل دئدی ننه بوْمنیم باجیم سنین قیزین بوْندان مغایات اوْل کی منیم جانیما آند ایچمیسن، دئو داها اونی یئمه دی. گونلرین بیر گونونده دئو گئدیر دی باجیسی گیله، دئدی قیز من گئدیرم خالان گیله من گلین جه ن بوْ حیاطی ائله سولییه جاقسان ائله سوپوره جاقسان، گلم گوره م زیبیل وار یا یئرین سویو قورویوب منم سن. دئو گئتدی، قیز سوپوردی یئل گتیردی زیبیل لدی هر نه ائلدی اوْلمادی اوتدی آغلادی، عبدول‌امل گؤیدن گئچیر دی گوردی بو قیز آغلییر، دوشدی دئدی قیز نه یه آغلیسان، قیز دئدی حیاطی سوپورورم زیبیل اوْلور، سولییرم قورویور. عبدول‌امل دئدی کی سن دئنن عبدول‌امل یاغیشی گل گل، گئت گئت عبدول‌امل یئلی گل گل، گئت گئت قیز دا بو سئحری اوخودی، دئو گلدی دئدی قیز سولادین سوپوردون، قیز دئدی بلی، دئو گیردی ائوه گوردی هر یئر سولانیب سوپورولوب دئدی آی قیز هئلی دی های هئلی دی عبدول‌امل فئلی دی دئو دا قیزی یییه بیلمه دی. بیر گون ده دئو گئدیر دی باجیسی ائوینه قوورما قازانین قویدی اوْجاغین اوستونه دئدی قیز من گلین جه ن بو قازانا آغلیه جاقسان گؤزوون یاشینن دولسون. قیز باشین ایمیشدی قازانا آغلیردی عبدول‌امل گویدن گئچیر دی گؤردی قیز آغلیر دوشدی گلدی دئدی قیز نه یه آغلیرسان دئدی ننه ن دییب آغلا بوْ قازانی دوْلدور. عبدول‌امل دئدی دور ایاغا بئش، آلتی دوْلچا سو گتیر تؤک قازانا دوْلسون بیر ایکی سیخما دا دوز آت ایچینه، ننه م سوروشسا دئنن آغلییب دوْلدورموشام. دئو گلدی دئدی قیز! آغلادین دوْلدوردون؟ قیز دئدی بلی، دئو دئدی هانی؟ گئچدی ائوه قازانی گوردی، دئدی آی قیز هئلی دی های هئلی دی عبدول‌امل فئلی دی یئنه دئو قیزی یییه بیلمه دی. بیر گون دئو گئتدی باجیسی گیله، دئدی باجی، من گئدیره‌م قیزی یوللی یه جاقام ماهنا قوطوسونا، سن قیزی توت یئ، دئو گلدی ائوینه. صاباح اوْلدی، دئو قیزا دئدی گئت خالان گیلدن سازاندئینن وازاندانی آل گتیر قیز دئدی سازاندئینن وازاندا نه مه نه دی، دئو دئدی دا سنه نه من دییرم اوغلومون طویودی گئت دئنه خالا، ننه م دیییر سازاندئینه‌ن وازاندانی وئرسین. قیز دوردی گئتدی،آز گئتدی چوخ گئتدی بیر قدیر یوْل گئتدی، سونرا اوْتدی آغلادی، گئنه عبدول‌امل گئچیر دی گلدی قیزا دئدی نه یه آغلیر سان، قیز دئدی دئو منی ماهنا یوللویور، خالان منی یییه جاق. عبدول‌امل اوچ دانا کاغاذ وئردی قیزا، دئدی گئده جاقسان بیردانا قره سو گوره جاقسان بیرین آچاجاقسان سووا دئیه جاقسان به به عجب گولابتون دی سونرا بولانلیق سو گؤره جاقسان، بیرین ده آچاجاقسان اوْ سوْوا، دئیه جاقسان به به عجب سوْدی، گئده جاقسان آغ سوْوا یئتیشه جاقسان، کاغاذی آچاجاقسان سوْوا، بیر قورتوم دا ایچه جاقسان دئیه سن به به عجب شیرین شربت ایمیش، گئده جاقسان گوره سن آرواد الینن چؤره ک یاپیر اوْنا ایلپیته وئره جاقسان، کیشی ساققالینن یئری سوپورور اوْنا سوپورگه وئره جاقسان، آچیق قاپینی باغلیه جاقسان، باغلی قاپینی آچاجاقسان، یئتیشه سن خالانین ائوینه. قیز گئتدی سولاری یئر به یئر ائله دی آروادا ایلپیته وئردی، کیشی یه سوپورگه وئردی، آچیق قاپینی باغلادی، باغلی قاپینی آچدی، خالا گیله یئتیشدی، خالا دئدی قیز نه یه گلمیسن؟ قیز دئدی کی ننه م دیییب سازاندئینن وازاندانی وئرسین دئو گئتدی تون تون دی تون تون دی بیر دانا کیبریت قوطوسونا ایکی دانا میلچه سالدی گتدی وئردی قیزا، دئدی ایتیرمه‌ها آپار وئر ننه وه، قیز دئدی بس آخی سازاندئینن وازازاندا...؟ دئو دئدی دا سنه نه سن بونی آپار وئر. دئوین یادیننان چیخدی قیزی یئسین. قیز ایکی قاپینی گئچمیشدی اوچونجی قاپیدا دئوین یادینا دوشدی کی من قیزی یییه جاقیدم، دئدی قیز دور اوْردا سؤز دیییرم، قیز بیلدی گوتورولدی قاشدی، دئو دئدی قاپی اوْنو توت، قاپی دئدی من آچیقیدیم منی باغلییب، دئدی قاپی اونو توت، قاپی دئدی نه یه من باغلیدیم منی آچیب، دئو دئدی کیشی اوْنوتوت، دئدی من ساققالیمینان یئری سوپوروردوم منه سوپورگه وئریب، دئدی آرواد اوْنو توت، دئدی منه ایلپیته وئریب، سولارا دئدی اوْنو توتون، سولارین بیری دئدی منی ایچیب دییب عجب شیرین شربت ایمیش، بیری دئدی مه نه دییب عجب سوْدی، بیری ده دئدی مه نه دییب عجب گولابتون دی. دئو قیزی توتانمادی، قیزدا قاشدی گئتدی، گئتدی بیر داغین اته اینده اوْتدی دئدی یخه م قوتولدی، آچیم گوروم بوْنون ایچینده نه مه نه وار، قوطونی آچاندا ایکی دانا میلچه اوچدی گئتدی، قیز باشلادی آغلاماقا کی من نه دییه جاقام، نه مه نه وئره جاقام. عبدول‌امل یئنه گئچیر دی، گلدی دئدی نه یه آغلیرسان، خالانین ائوینه گئتمه دین، قیز دئدی گئتدیم آمما سازاندئینن وازاندییه مه نه بونی وئریب. آچدیم گؤره م ایچینده نه مه نه وار، میلچه‌‌‌‌‌لر اوچدی گئتدی. عبدول‌امل سئحر اوخودی میلچه‌‌‌‌‌لر گلدی گیردی قوطویه، دئدی دا آشما، آپار وئر ننیه، قیز گئتدی، دئو گوردی کی قیز گلدی، دئوین گؤزلری دوْمبالدی، دیشلری قیجیلدی، سوروشدی هانی؟ قیز قوطونی وئردی، دئدی خالا مه نه بوْنی وئردی، دئو قوطونی آلدی دئدی، هئلی دی های هئلی دی عبدول‌امل فئلی‌‌‌‌دی دئو داها قیزی یییه بیلمه دی، گونلرین بیر گونونده ده دئو اؤلدی، عبدول‌امل ده قیزی اؤزونه خانیم ایله دی. یئدی یئدی یئرینه یئتیشدی، گویدن اوچ آلما دوشدی، بیری منیم، بیری سنین، بیری ده ناغیل دییه نین.
ناغیل دئیه ن... جمیله جعفری فلاحی نژاد
مکتوب ائدن... پروانه اسکندر جعفر زاده
ساغ اول لذت آپاردیم هیچ، ساخلادیم یولورام قیزیما که ادبیات اوستادی دیر